Gipahigayon niadtong Septiyembre 3, 2026 ang pag-apod-apod sa 3rd Quarter Social Pension alang sa mga kabus o indigent senior citizens sa 18 ka barangay sa lungsod sa Leon B. Postigo, Zambonga del Norte.
Gipangunahan sa Municipal Social Welfare and Development Office (MSWDO) ang maong payout nga gihimo sa Municipal Lobby, Municipal Covered Court ug Municipal Gymnasium, diin kapin sa 2,117 ka senior citizen beneficiaries ang nakadawat sa ilang pinansyal nga ayuda.
Matag benepisyaryo nakadawat og ₱3,000, nga gitumong isip dugang nga suporta sa ilang adlaw-adlaw nga panginahanglan ug pag-atiman sa ilang kaayohan.
Gipangunahan ang pagpatuman sa programa pinaagi nila ni MSWDO Head Mrs. Karelyn S. Daguno, RSW, OSCA Head Mrs. Salvacion T. Requilme, Cresa Bacolcol, ug Ms. April Neth R. Codino sa Protective Services Division–Social Pension RIX Office.
Sa maong kalihokan,gipakita sa lokal nga pangagamhanan ngadto sa mga senior citizen ang padayong suporta ni Leon B. Postigo Mayor Runie O. Jamora sa pagpalig-on sa mga programa nga nagtubag sa ilang panginahanglan.
Sa mensahe nga gihatod ni Municipal Information Officer Juanito S. Bagasina, Sr., gipasiugda ang pasalig sa administrasyon nga ipadayon ang pagpalambo sa mga serbisyo nga direktang makabenepisyo sa katawhan, ilabina sa mga senior citizen.
Padayon usab ang MSWDO sa pagpatuman sa social pension payout sa paagi nga hapsay, transparent ug episyente, aron masiguro nga ang ayuda husto nga maabot sa mga kwalipikadong benepisyaryo.(MEDALYN U. BORJA)
Source: SerbisyoGugma ni Mayor BobbyJam Jamora