Gipadayon ni Congressman Ian Amatong ang iyang koordinasyon uban sa national government agencies aron mapauswag ang duha ka importanteng pasilidad sa transportasyon sa Zamboanga del Norte—ang Lamao Port ug Dipolog Airport.
Human sa iyang miting uban sa Technical Education and Skills Development Authority (TESDA), mitambong si Amatong sa usa ka consultative meeting uban sa Department of Transportation (DOTr), diin gipangulohan ni Secretary Giovanni Lopez ang diskusyon sa mga concern ug development may kalabotan sa maong mga pasilidad.
Mitambong usab sa maong meeting si Philippine Ports Authority (PPA) General Manager Jay Santiago ug iyang team.
Gipaambit ni Santiago nga mahimong sugdan sa 2027 ang pagtukod sa passenger terminal sa Lamao Port, usa ka mahinungdanong development alang sa pagpalambo sa maritime transportation sa probinsya.
Mitambong usab ang mga representante sa Civil Aviation Authority of the Philippines (CAAP) aron hisgutan ang nahibiling mga requirement alang sa pagpatuman sa night flight operations sa Dipolog Airport.
Gipaabot ni Amatong kang Governor Darel Dexter T. Uy ang mga requirement nga kinahanglan matuman aron mapadayon ang mga lakang padulong sa pag-operate sa night flights sa airport.
Padayon ang koordinasyon ni Amatong uban sa mga national government agencies ug lokal nga mga opisyal aron mapadali ang pag-uswag sa mga proyekto nga nagtumong sa pagpalambo sa transportasyon ug konektibidad sa Zamboanga del Norte.
Gilauman nga ang pagpalig-on sa Lamao Port ug Dipolog Airport makatampo sa mas hapsay nga pagbiyahe, dugang nga oportunidad sa ekonomiya, ug mas lig-on nga koneksyon sa Zamboanga del Norte ngadto sa ubang bahin sa nasud.(IKEN B. GULLEM)
Source: Team Adrian Amatong