Nagpakita og suporta ang Office of the Provincial Agriculturist – Zamboanga del Norte (OPA-ZDN) sa kampanya alang sa mas himsog nga eskwelahan pinaagi sa pag-apil sa Orientation ug Planning sa Healthy Learning Institutions (HLI) nga gipangunahan sa Department of Health Zamboanga Peninsula Center for Health Development.
Si Senior Agriculturist Ed Neilson G. Gallemit ang mitambong isip representante sa opisina ubos sa liderato ni Acting Provincial Agriculturist Armie A. Bergado.
Target sa DOH sa 2026 nga madugang ang 191 ka eskwelahan sa rehiyon, lakip ang mga tunghaan sa Dipolog City ug Dapitan City, aron mapalambo ang mas himsog nga palibot sa pagkat-on.
Pinaagi sa Healthy Public Food Procurement Playbook, motabang ang OPA-ZDN sa pag-akreditar sa mga lokal nga kooperatiba sa mag-uuma ug mangingisda aron makasuplay og presko nga produkto sa school nutrition programs, samtang nagpadayon ang teknikal nga suporta sa “Gulayan sa Paaralan.”
Sumala sa OPA, ang himsog nga komunidad nagsugod sa luwas ug masustinar nga lokal nga pagkaon samtang ginapalig-on ang panginabuhian sa mga mag-uuma sa probinsya.(IKEN B. GULLEM)
Source: Office of the Provincial Agriculturist