Uban ang kusog nga panaghiusa sa katawhan, gisilibrar sa City Government of Dipolog, pinaagi sa City Nutrition Division, ang Nutrition Month Celebration Program didto sa Barangay Sangkol Covered Court, Hulyo 8, 2025.
Misalmot sa maong selebrasyon si City Councilor Hon. James Cyril O. Ruiz III isip guest of honor, nga mipuli sa presensya ni City Mayor Roberto Y. Uy.
Kauban usab sa kalihokan si Punong Barangay Hon. Rogelio D. Regañon sa Barangay Sangkol, uban ang mga opisyal ug personahe sa nagkalain-laing buhatan sa city government, nga misilbi isip mga hurado sa mga gipahigayong kompetisyon.
Gipakita sa mga residente sa Barangay Sangkol ang ilang aktibong suporta ug panaghiusa pinaagi sa pag-apil sa nagkalain-laing kalihokan nga nagpunting sa pagpalambo sa kahimsog ug nutrisyon sa komunidad.
Ang maong programa kabahin sa National Nutrition Month Celebration, nga nagtumong sa pagdasig sa katawhan sa pag-atiman sa ilang panglawas ug pagpanginahanglan sa husto, limpyo ug nutrisyon nga pagkaon alang sa mas lig-on ug himsog nga komunidad.
Nagpabilin ang City Government of Dipolog nga committed sa pagpadayon sa mga programa ug kampanya alang sa kahimsog ug nutrisyon, uban sa panaghiusa sa mga residente ug mga ahensya sa gobyerno alang sa mas luwas ug mas himsog nga Dipolog City.(Jumalisa Papa)
Source: DIPOLOG CITY GOVERNMENT