Giandam sa City Agriculture Office sa Dapitan City ang mga sako sa NFA rice nga gikuha gikan sa Tiguma, Pagadian City alang sa distribusyon ngadto sa mga barangay nga wala pa maserbisyohi ubos sa “Rice for All Program” niadtong milabay nga adlaw.
Tumong sa programa nga makatabang sa mga pamilyang nanginahanglan pinaagi sa paghatag og mas accessible nga supply sa bugas ug pagpagaan sa adlaw-adlaw nga gasto sa pagkaon, ilabina sa mga vulnerable nga sektor sa komunidad.
Gipasalamatan usab sa City Agriculture Office ang suporta ni City Mayor Evelyn T. Uy sa pagpalig-on sa mga programa nga may kalabutan sa food security ug social welfare sa siyudad.
Gihatagan usab og pagdayeg ang mga empleyado ug personnel nga mitabang sa pagkarga ug pagdumala sa mga sako sa bugas aron masiguro ang paspas nga distribusyon niini ngadto sa mga benepisyaryong barangay.
Matud pa sa lokal nga panggamhanan, kabahin kini sa ilang paningkamot nga masiguro nga walay pamilya nga mabiyaan sa mga programa ug serbisyong makatabang sa panginabuhi sa katawhan.(IKEN B. GULLEM)
Source: Dapitan City Agriculture Office