Mas mapadali na ang pag-atiman sa mga pasyente sa barangay human gipanghatagan sa lokal nga panggamhanan sa Sergio Osmeña og mga health kits ang mga midwives ug nurses sa 39 ka Barangay Health Centers sa lungsod.
Gipangunahan ni Mayor Glen N. Yu ang pagpanghatag sa mga medical equipment nga gilauman makatabang sa mas episyente nga paghatag og serbisyo panglawas sa komunidad, ilabina sa mga residente nga nagkinahanglan dayong medikal nga pag-atiman.
Lakip sa mga gipanghatag nga kagamitan mao ang nebulizer machine, BP apparatus, glucometer uban sa strips, stethoscope, pulse oximeter ug uban pang importanteng medical supplies nga gamiton sa adlaw-adlaw nga operasyon sa matag health center.
Sumala sa lokal nga panggamhanan, kabahin kini sa ilang paningkamot nga mapalig-on ang healthcare services sa mga barangay ug mapaduol ang serbisyong medikal ngadto sa katawhan, labi na sa mga nahimutang sa hilit nga lugar.
Dako usab ang pasalamat sa mga health workers tungod kay makapadali kini sa ilang trabaho ug makatabang sa pagmonitor sa kahimtang sa mga pasyente sa komunidad.
Gipahibalo usab sa munisipyo nga adunay dugang medical supplies nga moabot aron mas mapalambo pa ang serbisyo sa mga Barangay Health Centers ug masiguro ang padayon nga pag-atiman sa panglawas sa katawhan.(IKEN B. GULLEM)
Source: Zamboanga del Norte Provincial News Network