Nasikop sa gihimong search warrant sa mga operatiba sa Dipolog City Police Station – Special Drug Enforcement Team (SDET), uban sa koordinasyon sa PDEA 9, ang usa ka naila nga newly identified drug suspect, mga alas 7:30 ang takna sa buntag niadtong Agusto 31,2025 didto sa Purok 6, Barangay Lugdungan, ning dakbayan sa Dipolog.
Ang nasikop nga drug suspek naila nga usa ka lalaki, 35-anyos, mag-uuma ug residente sa nasangpit nga Barangay.
Nasakmit atol sa pagrekisa sa search warrant ngadto sa suspek mao ang usa ka big-sized heat-sealed transparent plastic sachet ug duha ka small-sized heat-sealed transparent plastic sachet nga adunay sulod sa gituohang shabu, nga gibana-banang mutimbang sa 3 gramos ug adunay standard nga presyo nga mobalor sa P20,400.00.
Narekober usab sa mga otoridad ang usa ka green plastic box nga adunay orange cover, usa ka open transparent plastic sachet, duha ka disposable lighter, duha ka aluminum foil nga gigamit isip improvised gutter, usa ka aluminum foil nga gigamit isip tooter, ug usa ka improvised flame reducer.
Ang search warrant giisyu sa Regional Trial Court, Branch 6, Dipolog City pinetsahan Agosto 29, 2025 alang sa kasong paglapas sa RA 9165.
Ang mga nasakmit nga drug items gi-turnover sa Zamboanga del Norte Provincial Forensic Unit alang sa eksaminasyon, samtang ang dinakpan anaa sa kustodiya sa Dipolog CPS alang sa tukmang disposasyon.(Medalyn U. Borja)
Source: ZNPPO