DAVAO CITY – Patay ang usa ka barangay kagawad human malambigit sa aksidente sa kalsada sa Tres de Mayo, Digos City, alas 7:45 sa buntag, Domingo, Agosto 31.
Giila ang biktima nga si alyas “Alyne,” 43 anyos, kagawad sa Barangay Sta. Josefa, Agusan del Sur.
Base sa imbestigasyon sa Digos City PNP, gimaneho sa biktima ang usa ka BDRRMC rescue vehicle nga sakay ang 14 ka pasahero. Sunod niini ang usa ka motorsiklo nga gimaneho ni alyas Jonard, 34 anyos, padulong sa Davao City.
Apan kalit nga nawad-an og kontrol ang usa ka dropside truck nga gimaneho ni alyas Alberto, 43 anyos, taga-Sta. Cruz, Davao del Sur, ug misulod kini sa lane sa rescue vehicle ug motorsiklo, hinungdan sa bangga.
Tungod sa kakusog sa impact, napinsala ang mga pasahero ug gidala sa Davao del Sur Provincial Hospital. Didto, napatay ang driver nga si Kagawad Alyne.
Anaa na sa kustodiya sa Digos City Police Station ang driver sa truck ug mag-atubang siya og kasong Reckless Imprudence Resulting in Homicide, Physical Injuries and Damage to Property. (Camille Santos Naraga)(Source: Contributed)