Nakighinabi sa Kapitolyo sa Zamboanga del Norte ang mga opisyal sa National Youth Commission (NYC) nga gipangulohan ni Assistant Secretary Gervy James Gumarit ug Chief of Social Marketing Division Cristabeth Jacinta Madrigal aron hisgutan ang mga isyu ug programa alang sa kabatan-onan.
Si First District Board Member Dario M. Mandantes maoy miabiabi sa delegasyon isip representante ni Governor Darel Dexter T. Uy, samtang mitambong usab ang mga Local Youth Development Officers gikan sa nagkalain-laing lungsod sa probinsya ubos sa pagpanguna ni Provincial Youth Development Officer Kate Cuenca.
Atol sa panagtigom, gihisgutan ang mga isyu nga may kalabutan sa Sangguniang Kabataan ug uban pang mga programa alang sa kabatan-onan. Gipahimulos usab sa mga Local Youth Development Officers ang higayon sa pagpangutana ug pagpangayo og giya gikan sa NYC aron mapalig-on ang ilang mga programa sa lokal nga lebel.
Usa sa mga nahisgutan mao ang gisugyot nga pagbag-o sa age requirement sa mga opisyal sa Sangguniang Kabataan. Matod sa NYC, ang maong lakang nagtumong sa paghatag og mas dako nga kahigayonan sa mga lider-kabatan-onan nga mapadayon ang ilang pagserbisyo ug mahiuyon sa age requirement nga gigamit sa ubang mga nasud sa ASEAN.(JENIFFER JR. DELICA)
Source: Zamboanga del Norte Provincial News Network