Giila ang Nasipang Barangay Health Center sa lungsod sa Rizal isip Level 1 Adolescent-Friendly Health Facility human mapasar ang assessment ug evaluation nga gipahigayon sa Provincial Health Office sa Zamboanga del Norte niadtong Abril 21 hangtod 23, 2026.
Gipangulohan sa mga evaluator nga sila Dr. Jane Lecias Jaug, Ma’am Elena Daarol, ug Maria Teresa Paquibot ang pag-assess sa pasilidad, diin nasuta nga natuman sa health center ang mga kinahanglanon alang sa maong accreditation.
Sumala sa mga opisyal, ang kalampusan bunga sa panagtinabangay sa Barangay Officials, SK, BHWs, BNS, ug health workers lakip ang Rural Health Midwife ug Municipal coordinators, ubos sa giya sa mga doktor sa lungsod.
Gipasiugda nga ang maong pagkilala magpasabot og mas maayong serbisyo alang sa mga kabatan-onan, samtang gisaulog kini isip dakong lakang padulong sa mas himsog ug lig-on nga kaugmaon sa kabatan-onan sa Rizal.(JENIFFER JR. DELICA)
Source: RIZAL RURAL HEALTH UNIT