Padayon ug mas gipadul-an pa sa lokal nga panggobyerno sa Siayan, Zamboanga del Norte ang pagdala sa nagkadaiyang programa ug serbisyo direkta ngadto sa mga barangay pinaagi sa Barangay Visitation Serbisyo Caravan 2026, nga gipahigayon sa Barangay Diongan, niadtong Septiyembre 4,2026.
Ang kalihokan gipangulohan ni Mayor Alberto J. Bongcawel, uban ni Vice Mayor Atty. Crisologo A. Decierdo, mga miyembro sa Sangguniang Bayan, mga opisyal sa Barangay Diongan, mga kawani sa LGU Siayan, partner agencies ug mga boluntaryo.
Gitutokan sa maong kalihokan ang paghatag og tabang sa mga pamilya, pagpalambo sa kahibalo bahin sa kahimsog, nutrisyon, kalinaw ug seguridad, ingon man ang pagtabang sa mga residente sa ilang mga transaksiyon ug panginahanglanon.
Lakip sa mga serbisyo nga gipahigayon ang libreng medical check-up ug pag-apod-apod og tambal, aron mas mapaduol sa mga lumulupyo ang batakang serbisyong panglawas. Gipahigayon usab ang feeding program alang sa mga gagmay’ng bata nga lima ka tuig ang edad paubos isip suporta sa hustong nutrisyon ug ilang pagtubo.
Gitagaan usab og pagtagad ang panginahanglanon sa mga pamilya pinaagi sa rice subsidy assistance, relief goods ug Pakaon sa Masa, samtang ang mga kwalipikadong benepisyaryo gitabangan usab pinaagi sa AKAP ug LGU-POF assistance.
Dugang pa niini, gipadali alang sa mga residente ang pagkuha ug pagproseso sa pipila ka dokumento pinaagi sa document assistance. Gihatagan usab og higayon ang mga kwalipikadong residente nga makaapil sa PhilHealth YAKAP registration aron mas mapalapad ang ilang access sa mga benepisyo ug serbisyo panglawas.
Kabahin usab sa caravan ang information drive batok sa illegal drugs ug mga kalihokan alang sa peace and security awareness. Pinaagi niini, gidasig ang komunidad nga aktibong makigtambayayong sa mga otoridad sa pagmintinar sa kalinaw ug kaluwasan sa ilang lugar.
Gipasiugda sa lokal nga panggobyerno nga ang maong inisyatiba gitumong sa pagsiguro nga dili na kinahanglan nga moadto pa sa sentrong bahin sa lungsod ang mga residente aron lamang makadawat sa pipila ka serbisyo, tungod kay ang serbisyo mismo ang gidala ngadto sa ilang barangay.
Pinaagi sa padayong pagpahigayon sa Barangay Visitation Serbisyo Caravan, gilauman nga mas daghang Siayanon ang maabot sa mga programa sa gobyerno, ilabina ang mga pamilya nga nanginahanglan og dugang nga suporta.
Gipakita sa programa nga ang serbisyo publiko mahimong mas epektibo kung kini direkta nga moabot sa komunidad—mas duol sa katawhan ug mas dali nilang ma-access.(MEDALYN U. BORJA)
Source: SikatSiayan