Nakadawat og pinansyal nga tabang ang mga partner beneficiaries sa Project LAWA at BINHI human ipahigayon ang pay-out alang sa mga partisipante gikan sa mga lungsod sa Sergio Osmeña, Sindangan ug Kalawit, Zamboanga del Norte, niadtong Septiyembre 4,2026.
Ang matag kwalipikadong benepisyaryo nakadawat og ₱8,280, nga katumbas sa ilang 20 ka adlaw nga partisipasyon ubos sa Cash for Work ug Cash for Training component sa proyekto.
Ang pagpagawas sa ayuda nahimong posible pinaagi sa koordinasyon sa nagkalain-laing lokal nga opisina, lakip ang Municipal Social Welfare and Development Office (MSWDO), Office of the Provincial Agriculturist, Municipal Agriculture Office, ug Local Disaster Risk Reduction and Management Office (LDRRMO).
Ang maong cash assistance gitumong dili lamang isip pinansyal nga suporta, kondili isip pag-ila usab sa panahon, paningkamot ug aktibong partisipasyon sa mga benepisyaryo sa mga kalihokan nga gilunsad ubos sa Project LAWA at BINHI.
Pinaagi sa proyekto, gidasig ang mga partisipante nga mahimong mas andam sa mga epekto sa climate change ug makatampo sa pagpalig-on sa food security sulod sa ilang tagsa-tagsa ka komunidad.
Gilauman nga ang padayong pagpatuman sa maong programa makatabang sa mga benepisyaryo sa pagpalambo sa ilang panginabuhian samtang nagpalig-on sa ilang kapasidad sa pag-atubang sa mga hagit nga mahimong dala sa mga katalagman ug pagbag-o sa klima.
Gipakita usab sa maong inisyatiba ang paningkamot sa mga ahensya sa gobyerno nga mas mapalapad ang suporta alang sa mga komunidad pinaagi sa mga programa nga naghiusa sa panginabuhian, food security ug climate resilience.
Ang Project LAWA ug BINHI nagpadayon sa paghatag og oportunidad sa mga komunidad nga mahimong mas lig-on, andam ug produktibo sa pag-atubang sa umaabot nga mga hagit.(MEDALYN U. BORJA)
Source: FO IX – Project LAWA at BINHI