Nagpadayon ang Department of Agrarian Reform (DAR) sa pagpalig-on sa panginabuhian sa mga Agrarian Reform Beneficiaries (ARBs) pinaagi sa paghatag og poultry livelihood assistance ug praktikal nga pagbansay sa mga benepisyaryo sa La Libertad ug Salug, Zamboanga del Norte kaniadtong Septiyembre 5,2026.
Ang kalihokan gidumalahan ni Provincial Agrarian Reform Program Officer (PARPO) II Daisy Dell Suan Digamon, gipangulohan sa Program Beneficiaries Development Division (PBDD) sa DAR Zamboanga del Norte ang mga kalihokan nga nagtumong sa pagtabang sa mga ARB organizations nga makapalambo og dugang nga tinubdan sa kita.
Gidawat sa El Paraiso Multi-Purpose Cooperative sa La Libertad ug Salug Farmers Multi-Purpose Cooperative sa Salug ang kinatibuk-ang 192 ka manok nga gitagana isip livelihood assistance ubos sa Enhanced Partnership Against Hunger and Poverty (EPAHP) program, uban sa suporta sa Belgian Government.
Sa maong kalihokan dili lamang sa paghatag og manok natapos ang programa,gipahigayon usab ang capacity-building training kabahin sa pag-atiman sa manok, produksyon sa itlog ug pagpamaligya aron maandam ang mga benepisyaryo sa pagdumala sa ilang poultry livelihood.
Gipangunahan ni Dr. Ian Pete Bandala ang pagbansay, diin gihatagan og kahibalo ang mga partisipante bahin sa hustong pag-atiman sa manok, paglikay ug pagdumala sa kasagarang sakit sa poultry, ingon man mga pamaagi aron mapauswag ang produksyon ug maandam ang ilang mga produkto alang sa merkado.
Gipangulohan ang pagpatuman sa maong mga kalihokan nila SARPO Leonesa S. Alpha ug ARPT Jamaika E. Aguhob, uban ang suporta ni ARPO I Carol Lyn Z. Darasin alang sa mga kalihokan sa La Libertad.
Pinaagi sa maong inisyatiba, gilauman nga ang mga ARB organizations makahimo sa pagpalambo sa gihatag nga livelihood assistance ngadto sa mas lig-on ug padayon nga panginabuhian.
Gipasiugda usab sa DAR nga ang tumong niini dili lamang ang paghatag og materyal nga tabang, kondili ang paghatag usab sa mga benepisyaryo sa kahibalo, kahanas ug oportunidad aron sila mismo makapadayon ug makapalambo sa ilang panginabuhian.(MEDALYN U. BORJA)
Source: DAR Zamboanga del Norte Province