Nakadaiyang mga proyekto nga naglakip sa mga water system, mini-covered courts, ug rescue vehicles, lakip ang service vehicles, ang opisyal nga giturn-over sa Kagamhanang Probinsyal sa Zamboanga del Norte ug sa Lokal nga Pangagamhanan sa Siayan aron mapalambo ang serbisyo publiko ug mga batakang pasilidad sa munisipyo, kaniadtong Hulyo 6.
Lakip sa mga gitugyan ang mini-covered courts sa Barangay Pange ug Barangay Guibo nga nagkantidad og ₱997,671 matag usa, water systems sa Barangay Gunyan ug Barangay Diongan nga nagkantidad og ₱988,894 matag proyekto, ug rescue vehicles alang sa Barangay Mangilay, Barangay Macasing, ug Barangay Soguilon.
Samtang, giturn-over usab sa Lokal nga Pangagamhanan sa Siayan ang lima ka service vehicles nga gamiton sa upat ka opisina sa munisipyo aron mas mapalig-on ang ilang operasyon ug mapadali ang paghatag og serbisyo sa katawhan.
Gipasalamatan ni Mayor Alberto Bongcawel si Governor Darel Dexter Uy tungod sa padayon nga suporta sa probinsya ug sa paghatag sa mga proyektong dugay nang gipaabot sa mga residente. Giawhag usab niya ang mga benepisyaryo nga ampingan ug husto nga gamiton ang mga maong pasilidad ug sakyanan.
Sa mensahe ni Gov. Uy, gipasiugda niini nga magpadayon ang Kagamhanang Probinsyal sa pagpatuman sa mga proyektong adunay direktang kaayohan sa mga komunidad isip kabahin sa paningkamot sa pagpadali sa kalamboan sa Zamboanga del Norte.(IKEN B. GULLEM)
Source: Zamboanga del Norte Provincial News Network