Nagpahigayon og malinawon nga kilos-protesta ang pipila ka mga civil society organizations sa Freedom Park sa Davao City kasabay sa pagsugod sa impeachment trial ni Vice President Sara Duterte sa Senado.
Atol sa programa, nanawagan ang mga partisipante nga ipadayon ang impeachment trial ug nga ang mahimong desisyon ibase lamang sa mga ebidensya ug sa naglungtad nga mga balaod.
Sa pagpanguna sa nagkadaiyang sektor, lakip ang mga progresibong grupo, gipasiugda sa mga nagprotesta ang kamahinungdanon sa accountability ug due process sa tibuok impeachment proceedings. Gihangyo usab nila ang Senado nga siguruhon nga patas, independente, ug transparent ang pagdumala sa paglilitis.
Hapsay ug malinawon ang nahitabong tigom ubos sa hugot nga pagbantay sa mga otoridad, ug wala’y gikatahong insidente nga nakasamok sa maong kalihokan.
Samtang nagpadayon ang impeachment trial sa Senado, gilauman nga adunay pa’y mosunod nga mga kalihokan ug pagpahayag sa nagkalainlaing baruganan gikan sa nagkadaiyang grupo sa umaabot nga mga adlaw.(Camille Santos Naraga)(Source: Contributed)