MUTIA, Zamboanga del Norte — Nagpadayon ang paningkamot sa lokal nga panggamhanan sa Mutia sa pagpalig-on sa food security ug nutrisyon pinaagi sa Orientation and Assessment for the Food Security and Nutrition System nga gipahigayon sa SeaOil Foundation.
Gitambongan ang kalihokan ni Mayor Lorrymir S. Adasa kauban ang mga representante gikan sa Municipal Nutrition Action Office (MNAO), Municipal Planning and Development Office (MPDO), Budget Office, DILG, Municipal Engineer’s Office, ug Municipal Agriculture Office aron hisgutan ang mga estratehiya ug programa alang sa mas himsog ug lig-on nga komunidad.
Gipasiugda sa maong orientation ang importansya sa koordinasyon tali sa mga ahensya ug lokal nga opisina aron masiguro ang igo nga pagkaon, maayong nutrisyon, ug malungtarong panginabuhian alang sa mga residente sa lungsod.
Sumala sa mga partisipante, ang maong lakang maoy kabahin sa mas lapad nga plano sa pagpalambo sa kalidad sa kinabuhi sa matag Mutiaanon pinaagi sa episyente ug dugayng mga programa sa panglawas ug agrikultura.
Pinaagi sa lig-on nga panag-uban sa lokal nga panggamhanan ug mga development partners, gilauman nga mas mapalig-on pa ang mga inisyatiba nga maghatag og mas himsog ug food-secure nga kaugmaon alang sa tanang Mutiaanon.(JENIFFER JR. DELICA)
Source: Mutia Lgu Mio