DAPITAN CITY — Pormal nang gisugdan sa Dakbayan sa Dapitan ang selebrasyon sa ika-63 Charter Week karong Hunyo 15 pinaagi sa usa ka dinagkong programa nga nagtigom sa mga opisyal sa gobyerno, empleyado, ug mga residente sa City Government Center Grounds.
Gipangulohan ni Mayor Evelyn “Belen” T. Uy, kauban si Vice Mayor Gabriel M. Cad ug mga miyembro sa Sangguniang Panlungsod, ang Ceremonial Banging of the Gong nga nagsimbolo sa opisyal nga pagsugod sa usa ka semana nga puno sa kalihokan ug kasaulogan. Gisundan kini sa Saludo Competition diin gipakita sa nagkalain-laing opisina ang ilang talento, panaghiusa, ug dedikasyon sa serbisyo publiko.
Gibuksan usab ang Charter Week Night Market pinaagi sa ribbon-cutting ceremony, nga naghatag og oportunidad sa mga lokal nga negosyante ug vendors sa pagpasundayag sa ilang mga produkto ug serbisyo samtang nagpalihok sa ekonomiya sa dakbayan.
Kabahin usab sa unang adlaw sa selebrasyon ang pagsugod sa Sports Fest 2026 diin 12 ka clusters ang magtinigi alang sa kadaugan sa nagkalain-laing sports events, nga nagpalig-on sa camaraderie ug teamwork tali sa mga empleyado sa syudad.
Gitak-opan ang unang adlaw pinaagi sa Cluster Singing Competition, samtang ang tibuok semana nga selebrasyon nagpadayon isip simbolo sa kasaysayan, kalig-on, ug padayong pag-uswag sa Dakbayan sa Dapitan.(JENIFFER JR. DELICA)
Source: Dapitan City Government