Padayon nga gipalig-on sa Lokal nga Panggamhanan sa Dapitan ang mga lakang alang sa pagpreserbar sa yamang-dagat pinaagi sa pagbuhi pag-usab sa 15 ka itloganong alimango sa katubigan sa Sunset Boulevard.
Gipangulohan ang maong kalihokan ni Mayor Evelyn “Belen” T. Uy ug City Agriculturist Cyril Patangan uban sa suporta sa mga on-the-job trainees (OJTs). Tumong niini nga mapanalipdan ang reproduktibong siklo sa mga alimango ug mapadayon ang natural nga pagtubo sa ilang populasyon sa lokal nga kadagatan.
Kabahin kini sa mga programa sa siyudad nga nagpunting sa malungtarong pagdumala sa pangisdaan ug pagpanalipod sa biodiversity. Pinaagi sa pagbalik sa mga itloganong alimango sa ilang natural nga pinuy-anan, gilauman nga mas mapalig-on ang mga kahinguhaan sa kadagatan ug masiguro ang padayon nga kaayohan sa mga komunidad nga nagsalig niini alang sa ilang panginabuhian.(IKEN B. GULLEM)
Source: Dapitan City Government