Giorganisa sa Lokal nga Panggamhanan sa Rizal ang Municipal Resilience Team o MResT atol sa DSWD KALAHI-CIDSS PAGKILOS Municipal Orientation nga gipahigayon sa Maniway Hall, Budgetel, aron mapalig-on ang kahandam sa munisipyo batok sa mga kalamidad ug uban pang hagit sa komunidad.
Gitambongan ang kalihokan sa mga representante sa nagkalain-laing opisina sa munisipyo, partner agencies ug mga Punong Barangay sa tanang 22 ka barangay, diin gipasabot ang mga tumong ug pamaagi sa pagpatuman sa DSWD KALAHI-CIDSS PAGKILOS Program ug ang papel sa lokal nga panggamhanan ug mga lider sa komunidad sa pagpalig-on sa disaster resilience.
Gipangulohan ni Mayor Marissa Manigsaca, Chairperson sa Municipal Resilience Team, ang panagtigom ug gipasiugda ang kamahinungdanon sa panaghiusa, aktibong liderato ug lig-on nga koordinasyon aron matubag ang kasamtangang mga hagit ug mapalig-on ang kahandam sa komunidad.
Pinaagi sa maong inisyatiba, gipalig-on sa Lokal nga Panggamhanan sa Rizal ang panagtambayayong sa mga barangay ug partner agencies aron mapauswag ang pagdumala sa kalamidad ug mapadayon ang kalamboan sa munisipyo.(JENIFFER JR. DELICA)
Source: Municipality of Rizal