Gikumbikto sa Regional Trial Court Branch 10 ang usa ka Municipal Civil Registrar tungod sa falsification ug paglapas sa Data Privacy Act of 2012, nga may kalabotan sa pagpagawas og peke nga birth record batok kang Dipolog Mayor Roberto Y. Uy.
Sa desisyon nga gipagawas ni Cherry Joy C. Concha-Ageas niadtong Marso 16, 2026, napamatud-an nga sad-an si Josephine S. Tormis sa duha ka kasong kriminal—falsification by public officer ubos sa Revised Penal Code ug paglapas sa Data Privacy Act.
Base sa rekord sa korte, giabusohan ni Tormis ang iyang posisyon niadtong 2015 pinaagi sa ilegal nga pagpagawas ug paghatag sa birth certificate ug LCR Form 1A ni Uy ngadto sa third party nga walay pahibalo o pagtugot gikan kaniya. Ang maong dokumento gigamit sa usa ka electoral case aron ipakita nga si Uy usa kuno ka Chinese citizen.
Apan, napamatud-an sa korte pinaagi sa mga dokumento nga si Uy usa ka Pilipino, natawo sa Mapang, Rizal, Zamboanga del Norte, ug anak sa usa ka naturalized Filipino. Ang maong electoral case kaniadto gipapas sa Commission on Elections tungod sa kakulang sa basehan.
Tungod sa desisyon, gisentensiyahan si Tormis og pagkabilanggo ug gipabayran og ₱500,000 matag kaso. Ang korte miingon nga napamatud-an ang iyang sala “beyond reasonable doubt.”
Sa iyang pahayag, giingon ni Mayor Uy nga ang desisyon usa ka pagpamatuod nga ang kamatuoran dili mapilde. “Dili buot ang kahitas-an nga molungtad ang daotan,” matud pa niya, samtang iyang gihulagway ang hukom isip paghinlo sa iyang ngalan ug kadungganan.(IKEN B.GULLEM)
Source: RoNey PaCilan Tv