Laing kalampusan ang natala sa lungsod sa Sindangan, Zamboanga del Norte human gibuksan ug gibendisyunan ang tulo ka multi-purpose hall sa Sindangan People’s Boardwalk, nga gilauman nga mahimong sentro sa lokal nga negosyo ug kalihokan sa komunidad.
Kini nga bag-ong pasilidad naghatag og organisado ug lig-on nga lugar alang sa gagmay’ng negosyante, vendor, ug lain-laing sektor nga nanginahanglan og espasyo alang sa ilang panginabuhian. Tumong niini ang pagpalihok sa lokal nga ekonomiya pinaagi sa pagdani og daghang mamalitay ug bisita sa maong lugar.
Mitambong sa maong okasyon ang mga opisyal sa munisipyo nga gipangulohan ni Mayor Glona Labadlabad, kauban ang mga barangay kapitan, si kanhi Mayor Rosendo Labadlabad, si Cong. Irene Labadlabad, ug si Jade Jamolod.
Ang maong proyekto kabahin sa mas lapad nga plano sa pagpauswag sa imprastruktura ug paghatag og dugang oportunidad sa mga residente. Gilauman nga pinaagi sa maong mga multi-purpose hall, mas daghang negosyo ang motubo ug mas mapalig-on ang panaghiusa sa komunidad.
Dugang pa, ang mga pasilidad giila nga simbolo sa padayon nga pag-uswag sa Sindangan, diin ang imprastruktura gigamit isip pamaagi sa pagpalambo sa panginabuhian ug kalidad sa kinabuhi sa katawhan.(IKEN B. GULLEM)
Source: Local Government Unit of Sindangan