Nagpadayon sa pagpanalipod sa kaluwasan sa publiko ang Zamboanga del Norte 2nd Provincial Mobile Force Company atol sa gipahigayon nga mga misa niadtong Marso 29, 2026.
Ubos sa pagdumala ni PLCOL Edwin D Verzon, gipahimutang ang mga pulis sa nagkadaiyang estratehikong lugar sa simbahan aron masiguro ang kahapsay ug kalinaw sa kalihokan. Lakip sa ilang mga buluhaton ang pagmonitor sa dagan sa mga tawo, pagpanalipod sa mga mananamba ug pari, ug pagpugong sa posibleng insidente.
Padayon usab ang koordinasyon tali sa kapulisan ug mga opisyal sa simbahan aron masiguro ang organisado ug malinawon nga pagdumala sa misa. Sumala sa taho, malinawon ug walay naitalang insidente ang maong operasyon.
Matud pa sa kapulisan, ang maong kalihokan nagpamatuod sa ilang lig-on nga pasalig sa pagmintinar sa kalinaw ug kahusay ilabi na panahon sa relihiyosong panagtapok.(IKEN B. GULLEM)
Source: Zamboanga del Norte 2nd PMFC