Nakuha ug misidlak ang lungsod sa Manukan sa prestihiyosong patimpalak nga Saulog Queen 2026 human gikoronahan si Ms. Ariana Phoebe E. Osborne isip bag-ong reina atol sa grand coronation night nga gihimo sa Zamboanga del Norte Cultural and Sports Center niadtong Hunyo 3.
Usa ang maong pageant sa mga pangunahing kalihokan sa SAULOG sa Bag-ong ZaNorte 2026 celebration diin gipakita sa mga kandidata gikan sa 17 ka local government units sa probinsiya ang ilang katahom, kaalam, ug garbo sa kultura.
Samtang, nasungkit ni Cindy Buhisan Morados sa Katipunan ang titulo isip 1st Runner-Up, si Andrea C. Parson sa Dapitan City maoy nahimong 2nd Runner-Up. Giproklamar usab si Sharian Maree Iana T. McCulloch sa Dipolog City isip 3rd Runner-Up ug si Kiara Angela Maagad Forrosuelo sa Sindangan isip 4th Runner-Up.
Gipaabot ni Governor Darel Dexter T. Uy ang iyang pagpasalamat ug pagdayeg sa tanang kandidata alang sa ilang dedikasyon ug maayong performance atol sa kompetisyon. Gidayeg usab niini ang 17 ka LGUs nga mipadala sa ilang mga representante aron ipakita ang kultura, identidad, ug pangandoy sa tagsa-tagsang lungsod ug dakbayan sa probinsiya.
Gipasalamatan usab sa gobernador ang mga organizers, sponsors, ug mga indibidwal nga nagpaluyo sa maong kalihokan sugod sa preparasyon hangtod sa malampusong pagpahigayon sa coronation night.
Labaw sa katahom ug talento, nagsilbi usab ang Saulog Queen isip plataporma sa pagpasiugda sa kultura, turismo, ug panaghiusa sa mga katawhan sa Zamboanga del Norte.
Isip bag-ong Saulog Queen 2026, gilauman nga mahimong embahador sa goodwill ug cultural pride si Osborne pinaagi sa iyang partisipasyon sa nagkadaiyang promotional ug community activities sulod sa iyang termino isip reina.(IKEN B. GULLEM)
Source: Zamboanga del Norte Provincial News Network