Padayon nga gipalapdan sa mga lider sa lalawigan ang access sa kalidad nga taas nga edukasyon pinaagi sa mga panukalang balaod alang sa dugang Jose Rizal Memorial State University (JRMSU) campuses sa probinsiya.
Gihingusgan ni 1st District Representative Pinpin Uy ang House Bill No. 7609 nga nagtumong sa pagtukod sa JRMSU Campus sa lungsod sa Sergio Osmeña Sr. aron mas mapaduol ang oportunidad sa kolehiyo ngadto sa mga kabatan-onan ilabina sa mga komunidad nga layo sa kasamtangang mga kampus sa unibersidad.
Kon mahimong balaod, pagatawgon kini nga JRMSU–Sergio Osmeña Sr. Campus nga gilauman makatabang sa pagminus sa gasto sa biyahe ug pagpuyo sa mga estudyante nga napugos sa pag-eskwela sa ubang lugar.
Samtang, aktibo usab nga miapil si Cong. Ian Amatong sa deliberasyon sa House Bill No. 8314 nga nagtumong sa pagtukod sa JRMSU-Sibuco Campus atol sa hearing sa Committee on Higher and Technical Education uban ang suporta ni Cong. Pinpin Uy.
Gilauman nga ang maong mga kampus makatabang dili lamang sa edukasyon kondili usab sa pagpalihok sa lokal nga ekonomiya ug kalamboan sa mga komunidad sa Zamboanga del Norte.(IKEN B. GULLEM)
Source: Team Adrian Amatong& Zampen News