Gipasa ni Congresswoman Irene G. Labadlabad kaniadtong Mayo 3 ning kasamtangang tuig ang duha ka mahinungdanong House Bills nga nagtumong sa pagpalambo sa serbisyo panglawas ug edukasyon sa nasud, ilabina sa Ikaduhang Distrito sa Zamboanga del Norte.
Lakip niini ang House Bill No. 9734 nga nagtinguha sa pag-upgrade sa Sindangan District Hospital ngadto sa usa ka Level II Hospital nga pagatawgon og “Sindangan Medical Center” ubos sa Department of Health (DOH). Pinaagi niini, gilauman ang mas maayong serbisyong medikal, dugang pasilidad, ug mas daghang healthcare workers aron mas matubag ang panginahanglan sa katawhan sa distrito.
Gipasa usab ni Cong. Labadlabad ang House Bill No. 9735 nga nagtutok sa pagpalig-on sa STEM Education System sa nasud. Tumong niini ang pagpaayo sa curriculum, pagpalambo sa kahibalo sa mga magtutudlo, modernisasyon sa school facilities, pagdugang sa mga eskwelahan, ug paghatag og scholarship opportunities alang sa mga estudyante nga gustong mosulod sa larangan sa Science, Technology, Engineering, ug Mathematics.
Matod pa sa kongresista, ang maong mga balaodnon maoy long-term investment alang sa panglawas, edukasyon, ug mas maayong kaugmaon sa kabatan-onan ug sa nasud.(IKEN B. GULLEM)
Source: Irene “Ate Ai” Labadlabad