Nabangga ug maayong pagkadasok ang usa ka Single Motor, ngadto sa usa ka Kotse, nga nagparking didto kilid sa National High-way sa Barangay Turno, ning Dakbayan sa Dipolog alas 11:20 sa buntag, Hulyo 10, 2025.
Sa pahayag nga giluwatan ni Alyas Dodong 23 anyos Ulitawo nga may ka Live-in partner nga residente sa Barangay Dansulian Lungsod sa Polanco, ning Probinsiya sa Zamboanga Del Norte, ug Driver sa Motor Single nga Click color itum ug nagtanga sa Plaka nga 0901-0526386, nga matud pa gikan siya sa Gasoline Station sa nasangpit nga Barangay, og sa dihang mopauli na unta siya sa lungsod sa Polanco, sa iyang pagliko subay sa National High-way, naligas ang iyang ligid gumikan sa basa nga kalsada tungod sa tubig nga nagagikan sa nahisgutang Gasolinahan.
Tungod sa iyang pagkaligas, nalubag niya ang Gasolinador sa iyang Motor, maong maayo kining pagkabangga ug pagkadasok sa luyong bahin sa naka parking nga Color Pula nga Mirage G4 nga Kotse, diin nagtangag kini sa plaka nga CCG 5364, ug maayong pagka lumping ang luyong bahin sa nasangpit nga sakyanan.
Pasalamat na lamang ang Driver sa Single Motor nga igo lamang napangus ang iyang Duha ka Tuhod ug gamay’ng Pangus usab sa iyang kamot ang naangkon niyang kadaot tungod sa maong maong disgrasya, maingon man nga nagpasalamat siya og dako sa tag-iya sa Kotse nga si Darios Cardinal 53 anyos, usa ka Tagalog nga Bulag sa Asawa, nga Temporaryong nanimuyo sa Victoria Country Homes sa Lungsod sa Polanco ning maong Probinsiya, nga matud pa, ipatrabaho lamang niini ang Damage sa maong sakyanan, ug mao lamang ang gastuhan sa nakabangga niini.(Julius Esmade)