Mas mapakusgan pa ang pagpatuman sa mga proyekto sa imprastraktura ug batakang serbisyo sa Dapitan human gipahibalo ang halos ₱800 milyon nga kantidad sa mga development projects atol sa pagsaulog sa ika-63 Charter Day sa siyudad.
Ang mga proyekto, nga gipadayag sa City Government of Dapitan, naglakip sa road concreting projects sa nagkalain-laing barangay, ₱100 milyon nga water system project nga magkonektar sa Barangay Opao ngadto sa sentro sa siyudad, ug ang pagtukod sa upat ka andana nga Justice Hall aron mapadali ang paghatag og serbisyo sa publiko.
Lakip usab sa development agenda ang pagtukod ug pagpaayo sa mga covered court, barangay halls, ug uban pang pasilidad nga gilauman nga makatampo sa pagpalambo sa edukasyon, komunidad, ug lokal nga pangagamhanan.
Sumala sa lokal nga panggamhanan, ang mga proyekto nagtubag sa dugay nang gipangayo sa mga Dapitanon alang sa mas maayong dalan, kasaligang suplay sa tubig, ug mas episyenteng serbisyo sa gobyerno.
Gilauman nga sugdan ang implementasyon sa mga proyekto ug ipadayon ang pagtuman niini hangtod sa tuig 2027 isip kabahin sa padayon nga kalamboan sa siyudad.(IKEN B. GULLEM)
Source: Zamboanga del Norte Provincial News Network