Isip pagdasig sa dugang boluntaryong pagdonar og dugo ug pagpasiugda sa kamahinungdanon niini sa pagluwas og kinabuhi, nagpahigayon og bloodletting activity ang City Government of Dapitan pinaagi sa City Health Office (CHO), sa pakigtambayayong sa Department of Health (DOH), isip kabahin sa pagsaulog sa World Blood Donor Day, nga adunay temang “One Drop of Humanity. Give Blood. Save Lives.”
Mitambong sila Mayor Evelyn “Belen” T. Uy ug Vice Mayor Gabriel M. Cad aron ipakita ang suporta ug pagpasalamat sa mga boluntaryong blood donors ug partner agencies tungod sa ilang padayon nga pag-amot sa komunidad.
Gipasiugda usab ni Mylene R. Torres-Sedon, Nurse II ug Donor Recruitment Officer sa DJRMH Blood Bank, ang kamahinungdanon sa regular nga boluntaryong pagdonar og dugo aron masiguro ang igo ug luwas nga suplay sa dugo alang sa mga pasyente.
Isip pagpasalamat, nakadawat og snacks ug tulo ka kilo nga bugas ang mga kwalipikadong blood donors.
Ang kalihokan nagtumong sa pag-awhag sa publiko sa regular nga blood donation, pagpasidungog sa mga donors, ug pagpalig-on sa lokal nga blood donation program aron masiguro ang padayon nga suplay sa luwas nga dugo alang sa mga nanginahanglan.(IKEN B. GULLEM)
Source: Dapitan City Government