SALUG, ZAMBOANGA DEL NORTE — Malampusong gipahigayon sa Salug District Jail ang Alternative Learning System Accreditation and Equivalency (ALS A&E) Test alang sa 16 ka Persons Deprived of Liberty (PDL), lakip ang 5 sa elementarya ug 11 sa junior high school.
Gipangunahan ang kalihokan ilawom sa liderato ni Rolly L. Paner, Acting Jail Warden, uban sa pakigtambayayong sa Department of Education Alternative Learning System. Gisubaybayan usab kini sa Division Testing Coordinator, BAE representative, ug PSDS sa Salug I District aron masiguro ang hapsay ug limpyo nga pagpatuman sa eksaminasyon.
Sumala sa mga tigpasiugda, ang maong programa nagtumong sa paghatag og ikaduhang higayon sa edukasyon alang sa mga PDL, aron mapalambo ang ilang kahibalo ug kahigayunan sa umaabot.
Gilauman nga pinaagi sa ALS, mas daghang PDL ang makapadayon sa ilang edukasyon ug makab-ot ang mas maayong kaugmaon bisan sulod sa pasilidad.(JENIFFER JR. DELICA)
Source: Salug District Jail-BJMPR9