Malampusong gipahigayon sa Philippine Coconut Authority (PCA) ang “Bayaniyugan sa Kalusugan: Mobile Health Services” sa Barangay Dinoan niadtong Mayo 19, 2026 aron magdala og libre ug accessible nga serbisyong panglawas alang sa mga coconut farmers ug residente sa komunidad.
Lakip sa mga serbisyong gihatud atol sa kalihokan mao ang medical consultation, basic health services, ug wellness support programs nga nagtumong sa pagtabang sa mga katawhang adunay limitadong access sa healthcare services.
Mipadayag si Municipal Mayor Dr. Ruth M. Brillantes og dakong pagpasalamat sa PCA ug sa mga partner agencies sa pagpili sa Salug isip benepisyaryo sa programa, ilabina alang sa mga mag-uuma sa lubi ug mga residente sa kabaryohan.
Gipasalamatan usab ang padayon nga suporta nila Gov. Darel Uy ug Congressman Ian Amatong nga nakatabang sa malampusong pagpatuman sa maong health outreach program sa lungsod.
Sumala sa mga organizers, ang kalihokan nagpakita sa lig-on nga panagtambayayong tali sa PCA, Provincial Government of Zamboanga del Norte, ug LGU Salug sa pagdala og libre ug dekalidad nga serbisyo panglawas ngadto sa katawhan.(JENIFFER JR. DELICA)
Source: Municipality of SALUG