DIPOLOG CITY — Gisaulog sa Dakbayan sa Dipolog ang International Museum Day niadtong Mayo 18, 2026 pinaagi sa usa ka Film Showing ug Talk Back Session nga gipahigayon sa Social Hall sa Dipolog City Hall.
Kabahin sa selebrasyon ang pagpasalida sa “Silkscreen,” usa ka 20 minutos nga independent short film nga gihimo sa mga Dipolognon ubos sa direksyon ni Rey Anthony Villaverde. Ang pelikula naghisgot sa tradisyonal nga silkscreen printing ug sa koneksyon sa pamilya, kultura, ug panginabuhian.
Gipakita usab sa maong pelikula ang pagpaningkamot sa usa ka pamilya sa pagpadayon sa ilang tradisyonal nga hanapbuhay samtang nag-atubang sa mga kausaban sa modernong panahon ug kompetisyon sa industriya sa printing.
Sumala sa mga organizers, ang International Museum Day nagsilbing pahinumdom sa importansya sa museums ug cultural activities sa pagpreserba sa kasaysayan, tradisyon, ug artistic creativity alang sa umaabot nga henerasyon.
Ang “Silkscreen” nakaangkon usab og pagkilala sa nagkalain-laing independent film festivals sa nasud, samtang ang direktor nga si Villaverde nailhan usab sa iyang uban pang short films nga nakaabot sa national film platforms ug competitions.(JENIFFER JR. DELICA)
Source: Dipolog City Government