Gipahigayon sa Provincial Government of Zamboanga del Norte (PGZN) ug Commission on Audit (COA) ang Exit Conference alang sa Calendar Year 2025 audit diin gituki ang mga audit findings, obserbasyon, ug rekomendasyon nga makatabang sa mas lig-on ug mas episyenteng serbisyo publiko sa probinsya.
Gipangulohan ni COA Regional Director Mathew Rey Magno ang audit team sa presentasyon sa resulta sa audit samtang mitambong si Governor Darel Dexter Uy, Vice Governor Julius Napigquit, mga department heads, hospital chiefs, ug ubang provincial personnel sa maong kalihokan nga gipahigayon sa Zamboanga del Norte Convention and Exhibition Center.
Matud ni RD Magno, importante ang exit conference aron adunay klaro ug lawom nga paghisgot tali sa COA auditors ug provincial officials kabahin sa mga audit findings ug rekomendasyon nga mahimong giya sa dugang pagpalambo sa operasyon sa gobyerno ug paghatag serbisyo sa katawhan.
Gipasalamatan usab ni Magno ang PGZN tungod sa kooperasyon ug suporta atol sa tibuok audit process nga nakatabang aron mahuman sa hustong oras ang audit engagement.
Pinaagi sa maong conference, gipakita sa PGZN ug COA ang ilang hiniusang paningkamot sa pagpalig-on sa transparency, accountability, ug maayong pagdumala sa pondo sa gobyerno alang sa mas maayong serbisyo publiko sa Zamboanga del Norte.(JENIFFER JR. DELICA)
Source: Zamboanga del Norte Provincial News Network