Mas mahimong modernisado ug data-driven ang pagpanguma sa lungsod sa Sibuco human opisyal nga mipirma og Memorandum of Agreement (MOA) ang Local Government Unit (LGU) sa Sibuco ug Department of Science and Technology Region IX (DOST IX) alang sa implementasyon sa Project SARAI CeNTRO.
Gipirmahan ang kasabutan sa DOST–Zamboanga del Norte Provincial Office sa Dakbayan sa Dipolog niadtong Hunyo 2, 2026 isip kabahin sa pagpalig-on sa paggamit sa siyensya ug teknolohiya sa sektor sa agrikultura sa lungsod.
Mitambong sa maong pagpirma sila Mayor Joel M. Ventura sa Sibuco ug Municipal Agriculture Officer Engr. Dioligrace T. Garcia uban sa mga representante gikan sa DOST–Zamboanga del Norte. Pinaagi sa maong partnership, ipatuman sa lungsod ang smart agriculture interventions alang sa mga prayoridad nga produkto sama sa lubi, humay, ug luy-a nga dakong tabang sa ekonomiya ug food security sa munisipyo.
Ubos sa Project SARAI CeNTRO, makagamit ang mga agricultural extension workers ug mga mag-uuma og teknolohiya nga naggamit sa weather data, crop modeling, remote sensing, ug decision-support systems aron mas mapalambo ang agricultural planning ug crop management.
Gituohang makatabang ang maong proyekto sa pagpalig-on sa produksyon ug pagpanginabuhi sa mga mag-uuma samtang padayon nga gipalapdan sa DOST ang paggamit sa digital agriculture tools sa rehiyon.(IKEN B. GULLEM)
Source: DOST Regional Office No. IX