Gipasiugda ni Governor Darel Dexter T. Uy atol sa iyang unang State of the Province Address ang EGBU Scale-Up Program nga gilauman makatabang sa pagpagawas sa 3,000 ka pamilya gikan sa kapobrehon pinaagi sa lig-on ug malahutayong panginabuhian sa sektor sa agrikultura.
Gipasalamatan sa gobernador ang pito ka lungsod nga kaabag sa maong programa, lakip ang Kalawit, Labason, Tampilisan, Godod, Liloy, Siocon ug Sibuco, diin nakahatag na ang probinsyal nga panggobyerno og kapin P3.6 milyon nga balor sa agricultural inputs, farm mechanization support ug fisheries assistance ngadto sa 26 ka asosasyon sa mag-uuma ug mananagat.
Gibutyag usab ni Uy nga giturn-over sa probinsya ang mga makinarya sa agrikultura nga nagkantidad og P212 milyon gikan sa Department of Agriculture ngadto sa 121 ka benepisyaryo nga gilangkuban sa mga kooperatiba sa mag-uuma, state universities and colleges ug lokal nga panggobyerno.
Samtang, nakabenepisyo usab ang sektor sa pangisdaan pinaagi sa pagturn-over sa 62-foot tuna fishing boat nga adunay modernong navigation ug fish detection system ngadto sa mga mananagat sa Dipolog City, isip kabahin sa paningkamot sa probinsya ug sa BFAR nga mapalambo ang produksyon ug panginabuhian sa mga komunidad nga nagsalig sa agrikultura ug pangisdaan.(JENIFFER JR. DELICA)
Source: Zamboanga del Norte Provincial News Network