Mas mapalawom pa ang pag-abot sa safety education ug disaster preparedness programs sa mga isla sa Selinog ug Aliguay human nagkasabot ang Bureau of Fire Protection (BFP) Zamboanga del Norte ug Department of Education (DepEd) Dapitan City sa pagporma og partnership alang sa community service initiatives.
Gikatakdang pormalon sa duha ka ahensya ang maong kolaborasyon pinaagi sa Memorandum of Agreement (MOA) karong Mayo 29, 2026.
Atol sa courtesy visit ni Education Program Specialist II Rene D. Acabal ngadto kang Acting Provincial Fire Marshal FSUPT Richard C. Timosa, DSC, gihisgutan ang pagtinabangay sa pagdala og life safety education, emergency preparedness training ug outreach programs ngadto sa mga komunidad nga layo sa sentro sa syudad.
Giingon sa BFP nga ang partnership magtugot sa mas organisado nga paghatag og serbisyo ilabina sa mga isla nga limitado ang access sa safety awareness ug government support programs.
Pinaagi sa kolaborasyon, gilauman nga mas maduol sa mga residente sa Selinog ug Aliguay ang mga programa nga makatabang sa pagpangandam panahon sa emerhensya ug kalamidad.
Kini nga inisyatiba kabahin sa paningkamot nga mapalapad ang serbisyo publiko ug mapalig-on ang kahibalo sa komunidad bahin sa kaluwasan ug disaster response.(IKEN B. GULLEM)
Source: DepEd Tayo-Division of Dapitan