Gidasig ni Governor Darel Dexter Uy ang mga local government accountants ug mga kawani sa gobyerno nga magpasiugda sa liderato, digital transformation ug kabag-ohan aron mapalig-on ang serbisyo publiko ug lokal nga pangagamhanan.
Gibutyag kini ni Gov. Uy atol sa pagbukas sa 21st Philippine Association of Local Government Accountants (PhALGA) Annual National Conference nga gihimo sa Dakak Beach Resort niadtong Mayo milabay nga adlaw.
Atol sa iyang mensahe, giingon sa gobernador nga kinahanglan nang mopahiangay ang mga lokal nga pangagamhanan sa modernong teknolohiya aron mas mapaspas ug mapalig-on ang paghatag og serbisyo sa katawhan.
Gipasiugda usab niya nga ang smart city technologies, digital integration ug modernisadong sistema sa pangagamhanan importante na karon aron masiguro ang episyente ug transparenteng serbisyo publiko.
Gihangyo usab ni Uy ang mga accountants ug finance professionals nga ipadayon ang maayong pagdumala sa pondo ug suporta sa mga programa sa gobyerno sama sa imprastraktura ug agricultural modernization.
Matud pa sa gobernador, dakong papel ang ginabuhat sa mga accountants sa pagpalambo sa lokal nga pangagamhanan pinaagi sa tukmang pagdumala sa pondo ug implementasyon sa mga proyekto.
Gidasig usab niya ang mga partisipante nga gamiton ang conference isip higayon sa pagbinayloay og best practices ug bag-ong pamaagi aron mas mapalambo pa ang public financial management ug governance sa nasud.(IKEN B. GULLEM)
Source: Zamboanga del Norte Provincial News Network