Mipirma kaniadtong Marso 30, 2026 si Governor Darel Dexter T. Uy og Memorandum of Agreement (MOA) uban sa Philippine Coconut Authority (PCA) alang sa Hospitalization Assistance sa mga mag-uuma sa lubi ug ilang mga benipisyaryo sa Zamboanga del Norte.
Gibase ang programa sa R.A. 11524 o Coconut Farmers & Industry Trust Fund (CFITF) ug ilalum sa Coconut Farmers & Industry Development Plan (CFIDP) Hospitalization and Medical Care Program. Tumong niini ang pagtabang sa mga coconut farmers sa ilang medical nga panginahanglan, lakip ang ilang legal dependents sama sa asawa, bana, common law partner, ug mga anak nga 20 anyos paubos o kung sobra pa, basta adunay medical need.
Ang benepisyo sa hospitalization coverage naglangkob sa P40,000.00 alang sa confinement sa tambalanan, samtang adunay P5,000.00 post-confinement coverage o outpatient coverage. Dili kini cash; ang PCA mohatag og Guarantee Letter nga direkta nga mobayad sa mga tambalanan o parmasya.
Gisugdan ang implementasyon sa upat ka tambalanan apan giingon sa PCA nga posible pa kini madugangan sa tibuok probinsya aron mas daghan ang makabenepisyo. Ang MOA gipirmahan uban sa presensya sa mga opisyal sa PCA lakip si Regional Manager III Bihildis A. Quezon ug uban pa.
Ilalum sa social protection program sa PCA, magpadayon usab ang mobile health services ug medical missions sa mga Geographically Isolated and Disadvantaged Areas (GIDA) sa probinsya. Ang mga mag-uuma gidasig sa pagparehistro sa National Coconut Farmers Registration System (NCFRS) pinaagi sa mga social workers sa PCA buhatan sa Sta. Isabel.
Kini nga inisyatiba nagpakita sa lig-ong paningkamot sa gobyerno ug PCA sa pagpalig-on sa suporta sa mga mag-uuma sa lubi ug sa ilang pamilya.(IKEN B. GULLEM)
Source: Zamboanga del Norte Provincial News Network