Sa usa ka kalihokan nga nagpunting sa panaghiusa ug padayon nga serbisyo, nagtapok ang mga senior citizens gikan sa nagkadaiyang 21 ka barangay sa Dakbayan sa Dipolog alang sa General Assembly nga gipahigayon kaniadtong Disyembre 23 sa Miputak Covered Court, Barangay Miputak.
Gipangunahan sa Federation of Senior Citizens Associations of Dipolog City (FSCADI) ang maong asembliya uban sa suporta sa Kagamhanang Lokal sa Dipolog pinaagi sa City Social Welfare and Development Office (CSWDO) ug sa Office of the Senior Citizens Affairs (OSCA) nga gipangulohan ni Mr. Sancen D. Caroro.
Mitambong ug mihatag og mensahe sa suporta si City Mayor Roberto Y. Uy, kauban sila si City Councilor Hon. Praxides P. Rubia, FSCADI Federation President Mr. Noli O. Eyao, ug FSCADI Federation Vice President Mr. Alberto C. Dinaga, nga nagpahayag sa ilang pasalig alang sa kaayohan ug kalamboan sa sektor sa mga senior citizens.
Atol sa programa, gihatagan og Certificates of Recognition ang mga Barangay Senior Citizens Association Presidents isip pag-ila sa ilang liderato ug serbisyo. Gipahigayon usab ang General Assembly Proper diin gituki ang Year-End Accomplishment Report, Annual Program Committee Report, Financial Status, ug Financial Audit Reports alang sa tuig 2025.
Gilakip usab sa kalihokan ang mga parlor games ug socialization activities nga nakahatag og kalingawan ug dugang panagkaubanay tali sa mga senior citizens.(IKEN B. GULLEM)
Source: Dipolog City Government