Gipadayag sa Bureau of Fire Protection (BFP) Zamboanga del Norte ang tinuod nga kahulugan sa Pasko human sila nanghatag og Noche Buena Packages ngadto sa mga pamilyang naapektuhan sa mga insidente sa sunog sa lain-laing lungsod sa probinsya.
Ang kalihokan gipangulohan ni FSUPT Richard C. Timosa, DSC, Provincial Fire Marshal, isip kabahin sa programa sa ahensya nga maghatag og tabang ug kahupayan sa mga komunidad nga nag-atubang og kalisod, labi na niining panahona sa kapaskuhan.
Sumala sa BFP, ang inisyatiba gitumong aron mapagaan ang kasubo ug kabalaka sa mga biktima, ug mapalig-on ang ilang paglaum nga adunay nagtan-aw ug nag-atiman kanila. Ang pagpanghtag sa Noche Buena nagsilbing simbolo sa pagpakabana, panaghiusa, ug kalooy nga ginadala sa BFP sa matag komunidad nga ilang giserbisyohan.
Gipamatud-an usab sa maong kalihokan nga ang papel sa bumbero dili lamang limitado sa pagpanalipod batok sa sunog, kondili naglangkob usab sa pag-alagad nga makatawhanon ug may kasingkasing, ilabina sa mga panahong labing nanginahanglan ang katawhan.(IKEN B. GULLEM)
Source: BFP R9 Zamboanga del Norte