Mosaka ang minimum wage rates sa Zamboanga Peninsula sugod Enero 1, 2026, subay sa Wage Order No. RIX-24, nga nagtakda ug bag-ong sweldo alang sa mga mamumuo sa non-agricultural ug agricultural establishments.
Sumala sa wage order, ang minimum wage sa non-agricultural establishments, lakip ang retail ug service establishments nga may 10 ka trabahante o labaw pa, mahimong ₱439 kada adlaw. Samtang ang minimum wage sa agricultural establishments, lakip ang retail ug service establishments nga adunay usa hangtod siyam ka trabahante, itakda sa ₱426 kada adlaw.
Gipahibalo usab nga mosunod pa ang ikaduhang hugna sa pagtaas sa sweldo sa Hunyo 1, 2026, diin ang minimum wage sa non-agricultural sector mosaka sa ₱464, samtang ang sa agricultural sector mosaka sa ₱451 kada adlaw. Gilauman nga ang wage increase makatabang sa pagpaayo sa kahimtangan sa panginabuhi sa mga mamumuo ug makatubag sa nagasaka nga gasto sa palaliton sa rehiyon.(IKEN B. GULLEM)
Source via: National Wages and Productivity Commission