Adunay bag-ong mini covered court nga pagatukuron sa Barangay Binoni, Salug human gilunsad ang groundbreaking ceremony alang sa maong proyekto, nga magsilbing sentro sa mga programa, dula ug ubang kalihokan sa komunidad.
Ang maong pasilidad gamiton alang sa sports activities, youth development programs, cultural events, barangay assemblies, ug mga tigom sa komunidad. Mahimo usab kining magamit isip evacuation o response area panahon sa emerhensiya kung gikinahanglan.
Sumala sa mga opisyal, kabahin ang proyekto sa padayon nga pagpalambo sa imprastraktura sa barangay aron adunay luwas ug angay nga pasilidad nga mapahimuslan sa tanang residente.
Nahimong posible ang pagpatuman sa proyekto pinaagi sa panagtinabangay sa mga opisyal sa nasyonal, probinsyal, munisipal ug barangay nga panggamhanan, uban sa suporta sa mga partner agencies ug stakeholders.
Giila ang mini covered court nga usa sa mga proyekto nga makatampo sa pagpalig-on sa panaghiusa sa komunidad ug sa paghatag og dugang nga lugar alang sa mga kalihokan sa Barangay Binoni.(IKEN B. GULLEM)
Source: Office of the Vice Mayor Municipality of Salug