Lima ka egg-bearing o nagdalang itlog nga alimango ang gibuhian sa Dapitan River niadtong Hulyo 2 isip kabahin sa paningkamot sa City Government of Dapitan sa pagpanalipod sa populasyon sa alimango ug sa mga kahinguhaan sa suba.
Gipangulohan ni Mayor Evelyn “Belen” T. Uy ang maong kalihokan uban ni City Councilor Dennis Tan, chairman sa Committee on Agriculture, City Agriculturist Cyril Patangan, ug uban pang mga bisita nga misuporta sa environmental conservation program sa siyudad.
Ang mga inahan nga alimango adunay liboan ka itlog nga mahimong mapusa ug makatampo sa pagpadayon sa populasyon sa maong espesye. Pinaagi sa pagbuhi niini sa ilang natural nga pinuy-anan, gisuportahan sa lokal nga panggamhanan ang pagpreserbar sa biodiversity ug pagmintinar sa balanse sa ekosistema sa Dapitan River.
Kabahin ang maong inisyatiba sa kampanya sa siyudad aron dasigon ang mga mangingisda ug mga komunidad sa pagpanalipod sa mga egg-bearing nga alimango ug uban pang mga kahinguhaan sa katubigan isip pamaagi sa pagpalig-on sa malungtarong pagdumala sa kinaiyahan.(IKEN B. GULLEM)
Source: Dapitan City Government