Laing field survey ubos sa Support to Parcelization of Lands for Individual Titling (Project SPLIT) ang gipahigayon sa Department of Agrarian Reform (DAR) Zamboanga del Norte sa Barangay Baluno isip kabahin sa pag-andam sa pag-isyu og indibidwal nga titulo sa yuta ngadto sa mga agrarian reform beneficiaries.
Gipangulohan ni Municipal Agrarian Reform Program Officer (MARPO) Limuel G. Regalado ang survey nga naglangkob sa mga yutang sakop ni Jenita Bicoy, Orlando Bicoy ug Danilo Bicoy. Kabahin kini sa unom ka landholding nga nakaiskedyul alang sa final survey sa lungsod sa Godod.
Naglakip kini sa pagsukod, pag-validate ug pagmapa sa mga yutang sakop sa programa aron masiguro ang tukmang parcelization sa matag landholding sa dili pa ipagawas ang indibidwal nga land titles.
Nasugdan ang survey operations niadtong Hunyo 29 ug gilauman nga mahuman sa Hulyo 13. Nahuman na usab sa survey team ang ground mapping ug ubang field assessment nga kabahin sa implementasyon sa Project SPLIT.
Pinaagi sa maong programa, padayon nga gipalig-on sa DAR ang paningkamot sa paghatag og lig-on nga land tenure sa mga benepisyaryo sa agrarian reform sa probinsya.(IKEN B. GULLEM)
Source: DAR Zamboanga del Norte Province