Padayon nga nabati ang kusog ug kasadya sa 27th P’gsalabuk Festival samtang gipahigayon ang nagkalain-laing sports events sa siyudad niadtong Mayo 16, nga nagtigom sa mga atleta, supporters, ug mga manan-aw gikan sa nagkalain-laing lugar.
Usa sa mga nakahatag og dugang excitement mao ang ikaduhang adlaw sa Invitational 1/8 Mile Moto Challenge nga gihimo daplin sa Dipolog Boulevard duol sa D’ Food Hub and Events Center, diin gipakita sa mga riders ang ilang abilidad ug kaisog sa lumba.
Gipahigayon usab ang P’gsalabuk Chess Tournament didto sa Plenary Hall sa Zamboanga del Norte Convention and Sports Center, samtang nagpadayon usab ang Invitational Badminton Tournament sa Dipolog Badminton Center diin nagtinigi ang mga players sa ilang talento ug sportsmanship.
Ang maong mga kalihokan dili lamang naghatag og kalingawan kondili nagpalig-on usab sa panaghiusa ug espiritu sa komunidad, nga maoy nagpadayag sa buhing selebrasyon ug kultura sa P’gsalabuk Festival dinhi sa Dakbayan sa Dipolog.(JENIFFER JR. DELICA)
Source: Dipolog City Government