GODOD, Zamboanga del Norte – Aron mas mapalig-on ang kahandam ug episyenteng pagdumala sa mga emerhensya, malampusong nakakompleto ang personnel sa Godod Municipal Fire Station sa tulo ka adlaw nga Incident Command System (ICS) Training nga gipahigayon gikan Mayo 13 hangtud 15 sa Godod Municipal Hall.
Ang maong pagbansay gipasiugdahan sa Local Disaster Risk Reduction and Management Office (LDRRMO) ug LGU-Godod ubos sa liderato ni Mayor Richie L. Uy, uban sa technical facilitation gikan sa Office of National Defence. Gipangunahan usab ang partisipasyon sa fire station ni SFO1 Allain L. Dolar.
Atol sa training, gipalawom ang kahibalo sa mga responder sa hustong incident management, koordinasyon, ug organisadong pagresponde sa panahon sa sunog, kalamidad, ug uban pang emerhensya aron malikayan ang kalibog ug mapaspas ang paghatag og tabang sa komunidad.
Sumala sa Godod Municipal Fire Station, ang ICS training usa ka importante nga lakang aron masiguro nga andam ug disiplinado ang matag responder sa pag-atubang sa bisan unsang peligro o krisis nga mahimong mahitabo sa lungsod.
Ang maong kalihokan nagpakita sa padayong paningkamot sa lokal nga panggamhanan ug mga responder sa pagpalig-on sa disaster preparedness ug pagpanalipod sa kinabuhi ug seguridad sa katawhan sa Godod.(JENIFFER JR. DELICA)
Source: BFP R9 Godod Municipal Fire Station