TAMPILISAN, Zamboanga del Norte — Liboan ka mga residente ang nakadawat og libreng serbisyo atol sa “KUYOG TA” Medical ug Serbisyo Caravan nga gipahigayon sa Provincial Government of Zamboanga del Norte ug LGU-Tampilisan didto sa Covered Court sa Poblacion niadtong Mayo 15.
Gidala sa maong caravan ang nagkadaiyang serbisyo sama sa libreng medical consultation, dental services, laboratory ug x-ray services, libreng tuli, tambal, bitamina, legal consultation, ug pagpanghatag sa SECPA o Certificate of Live Birth in Security Paper. Aduna usab serbisyo alang sa TUPAD beneficiaries, Real Property Tax campaign, ug “Benteng Bigas ng Pangulo” alang sa mga lumulupyo.
Gipangulohan ni Acting Provincial Health Officer Dr. Benzon Panaguiton ang medical mission uban sa mga Doctors to the Barrio gikan sa nagkalain-laing lungsod aron mas daghang pasyente ang mahatagan dayong serbisyo. Miduyog usab ang “Mobile Kitchen” ni Cong. Ian Amatong nga namahagi og mainit nga lugaw ug snacks ngadto sa mga mitambong.
Alang sa seguridad ug dugang serbisyo sa komunidad, mitabang usab ang 2nd Zamboanga del Norte Police Mobile Force Company ug mga sakop sa 97th Infantry Battalion nga mitanyag pa og libreng haircut para sa katawhan.
Matud ni Mayor Angeles Carloto ug Vice Mayor Norabeth Carloto, dako kaayong tabang ang maong caravan sa pagdala sa serbisyo sa gobyerno ngadto sa katawhan, ilabina sa mga nanginahanglan. Sumala sa kapitolyo, kabahin kini sa padayong programa ni Gov. Darel Dexter Uy aron mas mapalapad pa ang healthcare ug social services bisan sa mga hilit nga komunidad sa Zamboanga del Norte.(JENIFFER JR. DELICA)
Source: Zamboanga del Norte Provincial News Network