Gipasiugda sa probinsiyal nga kagamhanan ang nagkadaiyang proyekto ug tabang nga nahatag sa lungsod sa Baliguian taliwala sa mga pangutana nga migawas human sa pahayag ni Mayor Gani Esmali Jr. kabahin sa giingong pagdaug-daug sa ilang lungsod.
Gihisgutan sa usa ka pamahayag nga nakabenepisyo ang Baliguian sa daghang programa sa probinsiya, lakip ang pagdeploy sa heavy equipment atol sa landslide sa Barangay Linay niadtong Oktubre 2025, pagtabang sa pagrepaso sa Comprehensive Land Use Plan sa lungsod, ug pag-apruba sa daghang imprastraktura sama sa farm-to-market roads, road concreting ug pagtukod og konkretong bleachers.
Gipadayag usab nga napadali ni Governor Darel Dexter Uy ang alokasyon nga P5 milyon alang sa school building sa Barangay San Jose pinaagi sa Department of Education. Sa sektor sa panglawas, padayon usab ang pagtabang sa pagdala sa mga pasyente ngadto sa Zamboanga del Norte Medical Center ug ubang ospital sa Cebu ug Dumaguete alang sa seryosong mga kaso.
Giingon sa maong pamahayag nga importante ang patas nga pagtan-aw sa mga nahimo ug hagit sa panggobyerno, samtang gidasig ang panaghiusa ug kooperasyon sa mga lider aron mapadayon ang kalamboan sa Zamboanga del Norte imbes nga magpabiling natanggong sa panagbangi sa politika.(JENIFFER JR. DELICA)
Source: Zamboanga del Norte Provincial News Network