Gisusi sa Provincial Project Monitoring Committee o PPMC ang mga nagpadayon ug nahuman nang infrastructure projects sa Zamboanga del Norte atol sa ikatulong panagtigom alang karong tuiga didto sa Provincial Capitol sa Dipolog City.
Gipangulohan ang tigom nila OIC Provincial Administrator Charmie A. Yu ug OIC Provincial General Services Officer Engr. Dioscoro G. Endab uban sa mga miyembro sa PPMC, mga opisyal sa kapitolyo ug mga representante sa nagkalain-laing ahensya sa gobyerno.
Gipresentar usab sa Provincial Engineering Office ang listahan sa mga proyekto nga gipadayon sa administrasyon ni Governor Darel Dexter T. Uy, diin upat ka proyekto ang nakompleto na lakip ang mga classroom building sa Baliguian ug Mutia, ingon man concreting project sa Liloy.
Nasayran usab nga mokabat na sa 68 ka proyekto gikan sa miaging administrasyon ang gipadayon sa kasamtangang gobernador, samtang 28 ka bag-ong proyekto ang naaprubahan, diin upat niini ang ongoing ug usa na ang nahuman.(JENIFFER JR. DELICA)
Source: Zamboanga del Norte Provincial News Network