Gipahigayon ang groundbreaking ceremony alang sa proyekto sa pagkonkreto sa barangay road gikan sa National Road Junction ngadto sa Purok Terminal sa Barangay Nangcaan, Rizal, Zamboanga del Norte, isip kabahin sa pagpalambo sa imprastraktura sa maong barangay.
Gipangulohan ni Barangay Captain Primitivo Mangumpit ug sa mga opisyal sa Barangay Nangcaan ang kalihokan, nga gitambongan usab nila Mayor Marissa Manigsaca, Vice Mayor Jose B. Salac, mga miyembro sa Sangguniang Bayan ug mga opisyal sa munisipyo.
Ang maong proyekto gipundohan ubos sa Local Government Support Fund–Growth Equity Fund sa nasyonal nga panggamhanan ug gitumong aron mapauswag ang kahimtang sa dalan ug mapadali ang pagbiyahe sa mga residente.
Gilauman nga sa higayon nga mahuman ang proyekto, mas sayon ang transportasyon sa mga mag-uuma, mas luwas ang pagbiyahe sa mga lumulupyo, ug mas mapalambo ang kalihokang pang-ekonomiya sa Barangay Nangcaan.(JENIFFER JR. DELICA)
Source: Municipality of Rizal