Ang mga personahe sa Piñan Municipal Police Station (MPS) gipahigayon ang operasyon nga Oplan Bakal Sita sa mga imnanan sa lungsod sa Piñan, Zamboanga del Norte niadtong Setyembre 9, 2025.
Ang maong operasyon nagtumong sa pagpangita ug pagkumpiska sa mga iligal nga armas ug kontrabando nga posibleng magamit sa krimen o makadaot sa katawhan. Gipasiguro usab niini ang hapsay nga pagpatuman sa balaod ug pagpalig-on sa seguridad sa komunidad.
Gipangulohan sa kapulisan ang operasyon ubos sa pagdumala ni PMAJ Evelyn F. Porras-Acop, uban ang mahugot nga pagsunod sa mga protocol ug koordinasyon sa lokal nga mga opisyal. Matod pa sa Piñan PNP, padayon nilang ipatuman ang susamang mga kalihokan aron malikayan ang krimen ug mapreserbar ang kahusay ug kalinaw sa lungsod.
Gihangyo usab sa kapulisan ang publiko nga magtinabangay sa awtoridad pinaagi sa pagreport dayon sa bisan unsang ilegal nga kalihokan o mga indibidwal nga nagdala og armas nga walay hustong papeles.
Kini nga operasyon kabahin sa padayon nga programa sa Philippine National Police (PNP) nga nagtinguha sa mas luwas ug malinawon nga komunidad.(Jumalisa Papa)
Source: Piñan MPS